El Principáu va financiar la restauración de les brañes asturianes

La Conseyería de Cultura aprobó les bases pa la concesión d’ayudes pa la restauración y caltenimientu de los bienes d’interés patrimonial de les brañes asturianes, construcciones carauterístiques de l’arquitectura popular asturiana que reflexen conocencies adquiríes y tresmitíes de xeneración en xeneración. Les subvenciones van sirvir pa financiar la restauración o rehabilitación en bienes inscritos nos catálogos urbanísticos municipales o nel corpus d’Arquitectura Tradicional Asturiana de la Dirección Xeneral de Patrimoniu Cultural. Habrá una categoría empobinada a particulares y organizaciones ensin ánimu d’arriquecimientu y otra pa entidaes locales y pa la concesión el Principáu va valorar el caltenimientu estructural, la integración nel conxuntu y la singularidá.